Mae’r Pwyllgor Plant, Pobl Ifanc ac Addysg yn cynnal ymchwiliad i Blant a Phobl Ifanc ar yr Ymylon, sy’n ymwneud yn gryno â phlant coll a’r rhai sy’n agored i gamfanteisio troseddol.
Mae’r ymchwiliad hwn yn dilyn adroddiad y Pwyllgor ar ddiwygio radical ar gyfer plant sydd â phrofiad o fod mewn gofal. O’r dystiolaeth a ddaeth i law, amcangyfrifir bod y plant hyn yn cyfrif am bron i 40% o blant sy’n mynd ar goll yng Nghymru. Hefyd, soniwyd bod grwpiau penodol y credir eu bod mewn perygl o gael eu ‘troseddoli’ yn cynnwys plant sydd â phrofiad o fod mewn gofal, ceiswyr lloches sydd ar eu pen eu hunain, plant a phobl ifanc sy’n cael eu haddysgu heblaw yn yr ysgol, a phlant a phobl ifanc du a lleiafrifol ethnig.
Bydd yr ymchwiliad hwn yn canolbwyntio’n bennaf ar y canlynol:
- Plant sydd ar goll
- Plant a phobl ifanc sy’n dioddef camfanteisio troseddol
Byddwn hefyd yn canolbwyntio ar nodi grwpiau eraill o blant y nodwyd eu bod “ar yr ymylon,” fel ffocws posibl sesiynau craffu yn y dyfodol. Byddai’r rhain yn grwpiau o blant mewn amgylchiadau sy’n gofyn am ymateb penodol iawn gan wasanaethau plant neu ddarparwyr statudol eraill, ac yn blant y mae pryderon ynghylch yr ymateb presennol o ran polisi neu arferion.
I gael rhagor o wybodaeth am yr ymchwiliad ac i weld y cylch gorchwyl llawn, ewch i dudalen yr ymchwiliad.
Sut i rannu eich barn
Mae’r Pwyllgor wedi lansio ymgynghoriad, mae rhagor o wybodaeth am sut i gyflwyno ar gael ar dudalen yr ymgynghoriad. Y dyddiad cau yw dydd Iau 28 Mawrth.
SeneddPlant@senedd.cymru
@SeneddPlant
